لجميع المدونين والمدونات
اليوم وانا جالس على النت خطر في بالي سؤال
.
انا لي صداقات من ايام الدراسه ولي صداقات من بيئه العمل ولي صداقات من خارج محيط الدراسه والعمل سويا ولكن من هم اصدقائي في النت واخص عالم المدونات
.
علشان كده خطرت في بالي فكره اني راح اكتب اسئله وراح اجاوب عليها لعل وعسى اصدقائي اللي في النت يعرفوا شخصيتي اكثر وممكن تقوى صداقتنا . بدال ما يكون النت مكان هروب فقد من العالم الخارجي . اكيد راح يكون في مؤيدين للموضوع ومعارضين واحترم الخصوصيه
.
.
اسمي
رائد
.
اسم الشهره بين الاصحاب
ابو احمد
.
عمري
27
.
برجي
الجدي
.
شهادتي
لحد الان بكالوريوس اداره اعمال
.
.
شخصيتي
احب امزح كثير واعشق الاستهبال ، ولو في يوم زعلت من احد ارضى بسرعه بكلمه طيبه
جرئ كثير وخجول كثير ولا احد يسألني كيف؟ بس هي فعلنا كده واتوقع على حسب مستوى راحتي مع الشخص
.
معنى السفر عندي
اكتشاف عادات وتقاليد الشعوب الاخرى وبالعربي اتخارج من خلقه كل سعودي هههه
.
المزاج
شكلي يدل على اني هادئ وفعلا احيان اكون هادي
اتجه لاي شئ ممكن يضحكني
اكره اماكن الازعاج
واحيان يقلب راسي قفل ويقفل لو جاني صداع نصفي .. وعد واغلط ههههه
وما احب الخروج كثير
.
يومي خارج وقت الذروة
اما اكون على الجوال او العب اي جيم على كمبيوتري او التلفزيون
.
المشتريات بالنسبه لي
اوصفها بكلمه وحده انا مبذر
.
اكلي المفضل
الايسكريم والحلويات
.
الصفه الماخوذه من والدي
نشفان الراس واقلب عنيد
.
الصفه الماخوذه من امي
الطيبه والحنيه
.
اكثر سته اشياء اكرها
الحر .. الاستغفال .. النفاق .. الخيانه ..مديري .. المرض
.
اكثر سته اشياء احبها
اول شئ سر ؟؟؟ ..ابوي وامي .. اصحابي ..التميز.. الشيطنه والمقالب .. الاستقرار وبناء اسرة
.
مفهوم العمل عندي
مافي شئ مستحيل .. والاتقان
.
الكمبيوتر والنت في نظري
اختراع لا عنى عنه واصبح من الاساسيات مثل المشرب والمأكل
.
.
.
وامرر هذي الاسئله الى اصدقائي المدونين
.
.
حمزة
الفيلسوف
ثمود
لوست سول
الاسمراني راكان
دا دكتور
ريسي
جداوي
.
.
وامررها ايضا الى اصدقائي المدونات
.
.
ساره
تالا
مضيعه بيتهم
اسراء
سمبا
ليال
سالفه قلب
شادن
اروى
.
.
وكل منكم يمررها لمن يحب
.
.
واللي ما انذكر اسمه برضه يسويها واحتمال سقط اسمه سهواً
4 U
في البدايه وحشتوني كثير كثير .. ومعليش مانزلت الاسبوع الماضي بوست وفي نفس الوقت ما كنت اعلق عند الكثير منكم ولاسباب خاصه كانت عندي
وعلشان كنت مختفي الفتره الماضيه لازم ارجع من جديد بموضوعين محترمه
.
.
الموضوع الاول
.
وصلتني يا جماعه رساله اعجاب (من مجهول) على البريد الالكتروني .وليش ذلك فقط بل مجموعات من الرسائل منها
وحبيت اشاركم فرحه الشهره اللي صاير فيها انا هههههههه
ومنزل وحده من الرسائل من المعجبه
.
.
واقول امامكم يا صاحبه الرسائل لا تخذي مقلب فيا انا اقل من عادي
:))
.
.
واترككم مع نص الرساله
لم اكن يوما وابدا متطفلة .. اعــذر تطفلي واعذرني
..
منذ مدة طويلة وانا اقاوم رغبة في داخلي .. وانا احارب نفسي على البقاء بعيدة بكل ما بي من احاسيس وبكل ما بي من مشاعر ..
افكر في حالي هل تلك المشاعر هي حقيقة واقعة ام مجرد اعجاب ..
.
نعم اعجاب او اكثر من ذلك !!
اكتب هذه الكلمات والخوف يكبلني لا اعرف ماهي ردة فعلك لو قرأتها .. أترفضني ؟!! أم تتقبلها بكل رحابة صدر ..
أتسائل في داخلي هل هماك من تمتلك قلبك ،، من تستأثر باهتمامك ،، من تشغل تفكيرك ،، من تلتهم الحب معها ،، من هي حبيبة لك؟!!
أشعر بالغيرة منها !! نعم ويحق لك ان تعجب !! لا تظن انني اعاني من مشكلة ما !! او أني مفتقدة للحنان بل أنا احبك وكفى !!
وتسألني كيف يكون الحب من طرف واحد .. نعم احببتك ولم اراك .. احببت كلماتك .. احببت اسلوبك .. احببت طريقة تفكيرك .. احببتك حيت تبتسم وحين تتكلم بجدية .. احببتك حين تكون مازحاً واحببتك وقت الجد ..
ابعث لك بكلماتي وانا كلي أمل بأن تردعليها الرد الذي اتمناه ..
انا احبك فما ردك؟؟
صدقني لم اتعود ان أبعث رسالة لأي احد الا سواك .. فما عدت قادرة على الكتمان .. وما عاد لصبري من احتمال!! .. احبك وهذا ما أحسه حقيقة لا خيال ..
احبك واحببت اسمك .. ولأول مرة رأيت صورتك في مدونة صديقك حمزة لم أتمالك نفسي من الفرحة .. ذبت عشقا .. فأحببت قسمات وجهك وملامحك .. ولمحت انعكاس طيبتك على ذلك الوجه المليح ..وعرفت صورة من احببته ولم اعرفه ..
ارأيت كيف احبك .. أأدركت كيف اهواك ؟؟؟
نعم احبك فما ردك ؟!!
رجاء: ان كان جوابك النفي فلا تتجاهلني بل ابلغني .. فسأدعو لك بالسعادة مع من تحبها من كل قلبي
وارجو كذلك الا تكون اهدائاتي لك وايميلاتي السابقة قد ازعجتك !!
والسلام خير ختام
وهنا انتهت الرساله
.
.
اما الموضوع الثاني
orax
هو لمحبي الدي جيه والريمكس
راح اهديكم احد اعمال اوراكس قبل ما تنزل على الاسواق
:))
.
.
ما راح اطول عليكم بس فعلا لا يفوتكم
اهداء خاص لكل المدونين والمدونات
للاهميه
ترقبوا
قريبا جدا
قريبا جدا
قريبا جدا
قريبا جدا
قريبا جدا
قريبا جدا
قريبا جدا
.
.
من طوّل الغيبات جاب الغنايم
انتظروني
:))
وموعدنا الاسبوع الجاي
لا حياه لمن تنادي
مقتطفات بالعربي
.
.
صحيح انه رجال المرور والشرطه هم بواسل الوطن وتقف لهم وقفه احترام بس ما يمنع انك تلاقي حمير وسط هالبواسل
وكان سبب حُكمي :انه شئ طبيعي تلاقي تفتيش للمرور في الشارع بس المشكله انه بعد ما يطلب منك رخصة السواقه واستماره ملكيه السيارة وتكون في السليم، تنفجع انه يقولك ان الرخصه والاستماره ما عليها تصديق من الغرفة التجارية فعلا هذي جديدة .. فعلا حمار يعني نظره ما قدر يميز انا راكب سياره وللا دكان
ومن متى اصبح دور العسكري نفس دور موظف وزاره التجارة ولا اصبحوا يعشقوا الفلسفه والتلكيك للبشر.. فعلا بعد ما تظهر العين الحمره وتكشف عن انيابك يوصلك اعتذار عن الحاصل وبالعربي يجيبوا الكلام لنفسهم
.
.
قريبا جدا راح نسمع انه كان في جدة بشر عايشين والسبب انه جميع سكانها مهددين بالانقراض .. اجل الانقراض
ومثل ما قال الشاعر : تعددت الاسباب والموتُ واحدُ
اعمده الاناره متأكله من الصدأ وتكاد تطيح ، وحفر تبلع البشر مع سياراتهم ولا ننسى الحواجز الحديديه والاسمنتيه اللي اغلب الوقت خارجه من مكانها ومتجه على الشارع ولو عرفت تهرب من هذول كلهم ما راح تعرف تهرب من حمى الضنك
بالعربي ينفع يمثلوا فلم فاينل دستنيشن 4 في جدة
.
.
المراحل الدراسية من اولى ابتدائي لحد اخر سنه في الجامعه انت جالس تنذل وجالس على اعصابك تنجح او ما تنجح ومهمتك بس تسمع وما تتكلم لانك جاهل في نظرهم ،اكيد اول ما تتخرج راح بس تتكلم و ماراح تسمع لاحد وراح تقاطع الكل في كلامهم لانك مكبوت خلال مسيرتك العلميه وراح تعيد كل اللي حصل معاك على الجيل الجاي بالعربي العقده راح تستمر
.
.
هل يعقل وانت طالب جامعي مثابر وجالس في محاضره لدكتور، المفروض يكون محترم وليس واطي وحقير يجلس لك في نجاحك بسبب انه ابوك عضو شرف نادي من النوادي الجماهيريه وهو مشجع لنادي اخر منافس؟؟
بالعربي الواطي راح يفضل واطي حتى لو كان على درجه من العلم
.
.
قد تكون في قمه الفرح والسعاده لانك على مشارف اجازتك وتكون خلاص مسافر وناسي انه في رجعتك راح تنسى احلى ايام في سفرتك كلها وتتنكد لانه وانت في المطار يستقبلك ال .....؟ وبالعربي فيها الفساد الا ما رحم ربي
.
.
الدوائر الحكوميه لا تروحها الا اذا كنت تعرف احد فيها لانه راح تطلع عيونك اذا ما عندك واسطة وبالعربي هي معموله لاصحاب الواسطات
.
.
السوق طالع ، في طيحه ، هامور ، تجميع ، احمر ، مخضر ، داخل فيها قروب ،اليوم نسبه ،في هبده بالعربي اغلب من في السوق مثل الخراف بس تردد ولا تعلم انها سوف تأكل . معاهم معاهم عليهم عليهم
.
.
لوجاء واحد من الشعب وقال السياحه الداخليه مافي مثلها انا مجربها ، صدقوني لو جاته الفرصه يسافر للسياحه للخارج راح يكون اول واحد في المطار لانه خايف يقول الحقيقه المُره بالعربي اتورط ويبي غيره يتورط مثله علشان يبرد قلبه
.
.
ارحمونا ..ارحمونا
.
.
يتبع
انتهت استراحة المحارب
وعاد إلى اراضيه سالماً
.
.
وحشتوني موت موت
.
مشكوووووور على سؤالكم في فتره غيابي اقصد سفري
.
اكيد الكل منكم يبي يعرف شنو الغنايم اللي انا جايبها معي
.
لكن هيهات .. هيهات
.
جايب معي النكد والنفسيه التعبانه بسبب رجعتي ، ولو تبغوا منها اعطيتكم
:)))
.
بس جد فعلا غيرت جو
:))
وكان احد اسباب رجعتي بدري صديقي حمزة لانه وحشني
وكل يوم يتصل علي ويقول خلاص ياواد ارجع ولا تمسخها
والسبب الاخر سارة جننتني كل يوم معلقه كومنت وتقول خلاص ارجع المدونات مالها طعم بدونك
لحد ما طلعت عيني ههههههههه امزح
واكيد الباقي من المدونين لهم معزة واشتياق خاص جدا جدا
في سفرتي هذي حصلت مواقف لن انساها
كان من اهمها
سرقه فلوس من الخزنة الموجوده في الغرفه
وكمان جوالي ودع الملاعب وخرب بسبب عين بنت بريطانيه معانا
الضحكه فين؟؟ انه اول ماشافته انخبلت وقالت بالانجليزي طبعا
ايش هذا نوكيا الجديد اكيد غالي ومن لقافه السعودين وحب الكشخه اقولها كمان التصوير ثلاثه بكسل وقالت فعلا مره حلو وما كمل اليوم الا معلق وموراضي يشتغل والشريحه انحرقت
جوالي الثاني كويس كان معي بس المشكله انه كمان انسرق واللي سرقه جزاه الله خير استخدمه لحد ما فصله ورد الجوال وعليه مكالمات 2500 ريال
بس من المواقف الحلوة انه وانا مسافر كان معايا في روحاتي وجياتي قروب شباب وبنات من ايطاليا وبريطانيا
وكانوا الايطاليين يقولوا شكل جنسيتك مكسيكي وقلت داخل نفسي امشي معاهم للاخر وقلت ايوا انا مكسيكي
وكانوا البريطانيين يقولوا شكل جنسيتك ايطالي وبرضه قلت لهم ايوا
وصرت ماشي معاهم وهم مو دارين اني سعودي لاني حاولت اني افهمهم ما عرفوا ايش السعوديه ولا سمعوا عنها
فمشيت معاهم على اوهامهم اني مكسيكي وايطالي
:))
بصراحه هذي السفره من احلى السفرات والسبب القروب اللي معاي كان عيال ناس محترمين وقضينه سبعه ايام اروع ما يكون وكان اغلبها تشميس ورحلات بحريه لجزر اكثر من رائعه ونتيجه للتشميس الزائد جاتني حروق من الدرجه الاولى
وباقي الايام كانت تمشيات لمدن جديده ومناطق اكثر من رائعه وكان يومي يبدأ من الصباح الساعه سته لحد عشره الليل واختمها بفلم في السنيما
اما عن القروب اللي معي كانوا يكملوا باقي اليوم في الديسكو
وكان احلى مافي الموضوع انه اهلي الله يحفظهم كانوا كل يوم يتصلوا علي في الصباح وفي الليل يطمنوا علي اني رجعت وما دشرت هههههههه
على العموم ما اطول عليكم وشوفوا بعض الصور
صو.الصورة الجاية صورتي في الصباح ومني ملاقي مكان اعمل فيها تمارين الصباح
غير السقف حق الغرفة وترى هذا لوني بعد كم يوم بس تشميس
هذي الصوره حقت اليخت مهي مظهره الكبر الحقيقي له لانه مره كبير وهو نفس اليخت اللي رحنا عليه
لوحده من الجزر اللي تبعد عن مكان اقامتي واستغرقت الرحله ثلاثه ساعات ذهاب بس
هذي صوره الجزيرة اللي رحت لها باليخت وجلست فيها يوم كامل
وهذي الصورة تظهر ثلاثه اشخاص من القروب اللي معي
واحلى ما فيها انها الصور بعيده ومو واضحه والمسأله امنيه
وهي الصوره للمسبح الموجود على الجزيره واطرافة تكون مثل الشاطئ على البحر
وهذي صوره الغروب هناك اكيد مليون في المئه غير عن اللي عندنا وما اقول غير اه اه يالقهر
وهذي صوره اللوبي حق واحد من الفنادق اللي انا نزلت فيها
وكان القروب اللي معي اغلب وقتهم في الليل يسهروا في ديسكو الفندق او تلاقيهم على البار يعبوا الطاسه
وهذي الصوره ما يتعلق عليها لانه الصوره تحكي نفسها
منظر اخر للغروب
وهذي الصوره اهداء مني لكل من محبي الشطرنج
من المكان اللي اخذت الصوره كنت جالس اتشمس وماجابت تكمله المسبح
لهذي الصوره حكايه هذا الظاهر امامكم هو البط ومهو مثل اللي احنا نعرفه اللي لونه اسود من الوسخ وعيونوا مفقعه
وللمعلومه هناك البط يحافظ على رشاقته وصحته ومتربي على الطبيعه بس
هذي الصورتين الجايه في
planet hollyhood
ايادي اشهر ممثلين العالم
تره طفشت ومليت من تنزيل الصور
لانها اكثر من اثنين قيقا
ولسه باقي اماكن ومدن كثيره
اللي يبي الصور يراسلني علشان ارسلها له
وفي الاخير اشكر الجميع بلا استثناء وفي امان الله
استراحه محارب
رسالة
لمن يهمه امري
.
.
اعلن عن استراحة محارب
.
.
واني خارج الخدمة مؤقتاً
.
.
بسبب اجازتي السنوية
.
.
وراح احاول استمتع فيها قدر المستطاع وبطول وبالعرض
.
.
وحابب اثبت اني اقدر ادور العالم في اربعين يوم
.
.
لا تصدقوا امزح
.
.
خلوها نصف العالم ، علشان لا اطلع كذاب
.
.
برضوا قوية
.
.
خلوها ربع العالم ، ممكن تتصدق ، وهذا آخر كلام فعلا خلاص صدقوها
.
.
ولا اوصيكم انتبهوا على نفسكم
.
.
افراد عصابتي المحترمين ممنوع الانقلاب واخذ كرسي العماده وانا مسافر
.
.
وترى عندي عيون تشوفكم
.
.
وانتم ادرى الناس انا ماعندي غير طخ
.
.
عقلكم في راسكم تعرفوا خلاصكم
.
.
.
:))
.
.
وتبدأ اجازتي من يوم الاربعاء
الموافق
18 /10/2006
..
.
.
.
.
واقولكم قبل الزحمة
.
عيد سعيد
.
وكل عام وانتم بخير
.
وبصحه وسلامة
.
.
وما راح انسى عيدية كل واحد فيكم
.
.
.
.
واشوف وجهكم على خير
.
.
وفي امان الله
.
.
.
******************
.
اضافة مستعجلة: بدأت تظهر معالم اجازتي ، في اول يوم من اجازتي اخي الصغير محمد
يتعرض لحادث مروري مروع
.
.
دعواتكم
*******************
.
.
اضافة مستعجلة : والله العظيم قائل لكم بركات يوم الاربعاء بدأت تظهر وبدأت اتشائم من الاجازة
وكمان غير اخوي يتعرض لحادث اول ما اوصل العمل الاقي انذار من العمل
رحت قلت ياعمي مو مشكله طلعت من العمل، وما انتهى اليوم الا ادخل في مضاربه دمويه جدا كنت انا فيها واخوي الكبير وصديقي احمد مع مجموعه رجال امن واسفرت عن اصابه احمد في عينه .. بس الحق ينقال انضربوا ضرب رجال الامن ،والله حمار ما اكلوا في زريبه وكان بطل المعركه احمد
.
.
الف حمدالله على السلامه يا سوبر مان احمد ويعطيك العافيه
حكايه شارع المدونات الجزء الثاني
ابطال القصه الجدد
.
.
ريسي : الجنسيه ايطالي .. مشهور ببيع الاسلحه وهو احد افراد المافيا ومطلوب امنيا على مستوى العالم
.
شادن : نشاطها غير معروف ومبدأها في الحياه معاهم معاهم عليهم عليهم
.
.
.
القصة
.
.
في الجزء السابق توقفنا عند دعوة الفيلسوف لحمزة على ملعقتين فول تهدي اعصابه وفعلا اتفقوا انهم يروحوا لمحل اروى للفول وكان معاهم لوست سول
واول ما قربوا من المحل صارت المفاجئه ... تالا تبكي وتقول ليال اروى هذا هو هذا هو اللي كان يبغى يخطفني .. الحقوني جاي ياخذني
راحت قالت اروى بسرعه اركبوا الوانيت حقي عبال ما اجيب جره الفول معايا وفعلا ركبوا الوانيت واروى جابت جره الفول
هههههههه لازم الجره حقت الفول حبها الاول والاخير
اروى تحاول تشعل الونيت مو راضي يشتغل.. وتحاول مو راضي يشتغل وحمزة يقرب من المحل
اول ما ما وصل حمزة عند المحل اشتغل الوانيت وانطلقوا .. والشارع اصبح كله دخان بسبب الوانيت منتهي الصلاحيه
حمزة والفيلسوف ولوست سول استغربوا من الحاصل وانه اول مره اروى تخرج من المحل وبالسرعه هذي منطلقه
.
.
.
مين شاف الموقف هذا وبدأ يستغل الحاصل .. سندباد مصري .. بدأ ينشر انه شاف دخان من محل اروى وانه الفيلسوف وحمزة ولوست سول فجروا المحل بالموجودين وسرقوا جره الفول وهربوا وبدأت الاشاعات
.
.
وفي هذه الاثناء حمزة وفيلسوف ولوست سول شافوا المحل مافيه احد اتفرقوا وكل راح في طريقه وقالوا الجيات اكثر
.
وفي الطريق اروى وليال كانوا في الوانيت وتالا في حوض الوانيت مع جره الفول دار الحوار التالي
ليال : ليش يا اروى ما تغيري سيارتك بدال هذي الخرده .. اللي اعرفه عندك فلوس على قلبك من بيع الفول
اروى : ما اقدر هذي السياره وارثتها من جدي السادس عشر
ليال : اها فهمت
قالت اروى :المهم لازم نبلغ عن حمزة في الشرطه
قالت ليال: الشرطه ما راح تعمل شئ
قالت اروى :طيب الحل
ليال: ممممممممممم
قالت اروى : لقيتها مالنا غير المديريه العامه للامن القومي
ليال : برافوا عليكي
اروى : طلعت من الشباك وتقول لتالا اتمسكي مضبوط وامسكي الجره معاكي تمام
.
.
وفعلا راحوا طيران على المديريه العامه للامن القومي
واول ما وصلوا قالوا لحارس البوابه وين نلاقي رئيس القياده والاركان
الحارس : رئيس قياده واركان .انتم صاحين احنا مو وزاره الدفاع
قولوا :ما علينا المهم نبغى اكبر واحد موجود وبالعربي الرأس الكبيره ،والموضوع مهم وسري للغايه
.
.
خاف الحارس وقالهم في الدور الرابع تلاقوه .وفعلا طلعوا وحكوه القصه
ومدير المديريه امر باستدعاء العميل 003 وبسريه تامه
مافي دقايق الا ووصل العميل 003 والمفاجأه العميل طلع ماشي بوند اللي هو ماشي صح
عرفوه البنات وقالوا هو انت
قال لهم ماشي بوند .. شفتوا كيف انا متخفي المهم هذا سر بيننا
وفعلا تم تكليف العميل 003 بملاحقه حمزة واحضاره باسرع وقت
.
.
.
في هذه الاثناء حمزة جالس يفكر كيف ممكن ينتقم من ساره.. فكر فكر مالقى حل غير يتصل على صاحبه رائد راعي المشاكل .. وفعلا حكاه قصه الهمر الاسود
.
رائد رد عليه وقاله الثار ولا العار لازم تنتقم بس بعنف شوي انا راح ارسلك لواحد من الجماعه يبيع اسلحه وقوله انك من طرفي وخذ اي سلاح ونحاول نصيدها ونطخها ..
حمزة يقول : انت يا تطخوا يا تكسر مخه .. ايش الاجرام اللي انت عايشه
رائد : مالك حل غير هذا او تكون جبان ميت
حمزة : خلاص طيب .. اوصف كيف اروح لصاحبك بياع الاسلحه
رائد : اركب مترو الانفاق واول ماتوصل المحطه اللي بعدها .. تنزل راح تلاقي واحد لابس بالطوا جلد اسود ، روح عنده وقولوا يسلم عليك الفاذر ألباتشينوا .. وقتها راح يقولك امشي وراي لحد ما يدخلك مطعم ايطالي .. وقتها راح ينزلك البدروم علشان تختار الاسلحه اللي تبيها ..واسم البياع ريسي .. فهمت او اعيد
حمزة : فهمت وشكرا يا صاحبي
.
.
وفعلا راح حمزة على حسب كلام رائد
.
.
وبعد ساعه
.
ساره وصلت بيتها وجالسه تفكر ايش تعمل في المصيبه اللي هي فيها ؟
وجلست تفكر!! وكمان تفكر!! وقررت تروح القهوة تشرب حجر شيشه وتفكر بروقان وتهدي اعصابها
وفعلا شربت الشيشه وريحت الجمجمه من الضغط ، وخطرت في بالها الفكره
وقالت انا ماليا غير اروح لعمي (الجود فاذرألبتشينو) يحل الموضوع .. وراحت لعمها
وركبت الهمر واتجهت خارج المدينه متجهه لقصر عائله ألبتشينو
واول ما وصلت دقت جرس البيت .. تن تن
راح انفتح الباب وكان في استقبالها رئيسه خدم عائله ألبتشينو شادن
وقالت : اهلين ساره
ساره : اهلين شادن .. ممكن اقابل عمي رائد
شادن : دقيقه اعطيه خبر
ساره : طيب
.
.
بعد مرور 30 دقيقه من الوقفه عند الباب
.
شادن : ياساره الان هو فاضي تقدري تتفضلي هو ينتظرك في مكتبه
ساره: شكرا
.
واول ما دخلت ساره المكتب راحت سلمت على يد عمها رائد وقالت : كيفك ياعمي ؟ واسفه اني جيت بدون موعد
رائد : اجلسي جنبي وقولي ايش عندك مصايب بسرعه
ساره : عمي انت عارف انه ماعندي في الدنيا غيرك
رائد : ادخلي في الموضوع بدون لف ولا دوران
ساره: طيب
رائد : دقيقه ساره .. انا شام ريحه شيشه .. انت تشربي حجر
ساره : لا
.
اول ما قالت لا رائد قام اعطاها كف على وجهها وقال : كذابه
رائد : كم مره قلت لكي لاتشربي شيشه .. اشربي سيجاركوبي
ساره : حاضر عمي وكلامك اوامر
رائد : ايش موضوعك
.
.
وقامت ساره بحكايه القصه كامله لعمها ( الجود فاذر ) رائد
.
عمها اصابه حاله من الذهول لانه طابق كلامها مع الكلام اللي وصله من صديقه حمزة
وانه امر بقتل البنت وهو ما كان عارف انها بنت اخوه ساره
.
.
رائد بدأ يفقد اعصابه وصار يصرخ .. شادن شادن تعالي
شادن : نعم
رائد : اتصلي على العميل ماشي بوند وحولي الخط على المكتب بسرعه
شادن : طيب
.
.
في اقل من 30 ثانيه اتحول الخط
.
.
رائد : الووووو بوند
ماشي بوند : هلا وغلا بـ الجود فاذر ألبتشينو
رائد :يا بوند انت من زمان متعامل معانا وجاسوس لنا في مديريه الامن القومي .. ابغاك بسرعه تجيب عندي حمزة
ماشي بوند : حتى انا كان مطلوب مني احضره للمديريه لانه مطلوب بقضيه اختطاف
رائد : لا تكثر هرج جيبوا معاك بسرعه وراح تلاقيه الان في مطعم نابولي الايطالي
.
وانقفل الخط
توووت تووت تووت
.
وفعلا راح العميل 003 المطعم ومسك حمزة واحضره عن الجود فاذر
واول ما وصلوا طلب الجود فاذر رائد من بوند احضار سندباد مصري والفيلسوف ولوست سول واروى وليال وتالا و بياع الاسلحه ريسي
.
.
وفي اقل من ساعه قدر العميل الفذ ماشي بوند من اتمام المهمه واحضارهم
وقبل البدأ في الاجتماع
رائد : يااا شادن شادن تعالي بسرعه
شادن : نعم
رائد: تعالي اجلسي
.
.
وفعلا بدأ الاجتماع بتواجد الجميع
وفي بدايهالاجتماع الجود فاذر رائد سأل ريسي
وقاله : ايش اجدد سلاح عندك
ريسي : هذا المسدس كاتم الصوت ودخيرته ما تنتهي طال عمرك
رائد : هات المسدس
ريسي : ابشر طال عمرك
.
.
رائد اخذ المسدس ومسكه في يده وقال : في مجموعه معانا احنا ما نحتاجهم معانا في الاجتماع وجبتهم بس علشان ارتاح منهم واقتلهم والباقي يكملوا معانا
.
.
دار الرعب في قلوب الجميع
.
.
وكانت اول ضحيه شادن
طخ طخ
والسبب انها دافعت في كومنت البوست الجزء الاول عن اروى هههههههههه اعتبرها جاسوسه
والضحيه الثانيه اروى
طخ طخ
والسبب كانت تحط في جره الفول مخدرات وادمن عليها الفيلسوف و ماكانت تعطيني حقي من الضرائب
والضحيه الثالثه سندباد مصري
طخ طخ
والسبب انه يحب تحريف الكلام وراعي اشاعات
والضحيه الرابعه تالا
طخ طخ
والسبب انها غيرت مجرى القصه واتهمت حمزة بخطفها وكده تكون كذبت
.
.
وبدا الاجتماع
رائد : يا فيلسوف بما انك دكتور قوم شيل الجثث وقطعها وارميها بره القصر وياريت يكونو عبره لك
رائد :يا لوست سول خليك في حالك بعيد عن المشاكل وخلك جنب الحيط واعتبر من اللي حصل
رائد : يا ريسي راح ارحلك على ايطاليا من جديد لانهم محتاجينك هناك اكثر وكفايه بيع اسلحه
رائد : يا حمزة .. انت صاحبي بس ما ارضى تتعدى على احد من عائله ألبتشينو راح اسامحك بس وانسى الموضوع بس اوعدني ما تتعرض لها من جديد وتبطل العصبيه الزايده ضد السيارات الامريكيه
رائد : يا ساره تعالي بوسي يدي وحطي مفتاح الهمر على طاوله المكتب وانت محرومه من الميراث ورأفه فيكي راح اعطيكي وانيت اروى
ماشي بوند : انت من اليوم ورايح ذراعي اليمين .. اتوقع الان مبسوط
رائد : يا ليال هذا شيك مفتوح المبلغ خذيه وافتحي مكتبه اكبر..واستنفعي ونفعي الجيل الجاي معاكي
.
.
.
اما انا راح اخذ اجازة من المافيا وارتاح شوي من صجه شارع المدونات
.
.
اخواني اخواتي ابطال قصه شارع المدونات اتمنى لا احد يزعل مني انا حبيت امزح وارسم ابتسامه لي ولكم
وبالتوفيق للجميع
حكايه شارع المدونات
كان يا مكان في عالم كله كلام .. عالم اسمه مدونات
.
.
.
في البدايه ابطال القصه هم
.
.
.
حمزة : يكره السيارات الامريكيه كره العمى ، ويلقبها زباله امريكيه وفي مقوله اخرى علبه امريكيه
.
ساره : صاحبت اشهر همر في السعوديه، لانها اول بيت تسوق (بالعربي واسطتها قويه) وراعيه مشاكل
.
فيلسوف : دكتور همه الاول والاخير البيت ، المسجد ، المستشفى ،ومحل الفول القريب من بيتهم
.
اروى : البنت الهادئه.. صاحبت مطعم على رأس الشارع ..لبيع الفول وطول وقتها قدام حبها الاول والاخير جره الفول وترى هو نفس المحل اللي الفيلسوف يشتري منه
.
تالا : البنت المدلـله والبرئيه تعشق لبس مريول المدرسه (صبح وليل) ، وطول وقتها تحب تلعب قدام مبنى وزاره الاعلام
.
ماشي صح : صفاته طول وقته ماشي في الشارع ولابس نظاره نظر من حقت المثقفين( حقت ايام زمااااان الكبيره)ومعاه كتب كثير وينصح الناس ،وينتقد اللي يعمل غلط
.
سندباد مصري : راكب سجاده ، وطاير فيها في السما ويدور على الاشاعات وخرافات يقنع الناس فيها وهذا من طفشه
.
ليال : منعزله عن الناس، ودائما جالسه على كرسي قدام محلها محل لبيع الكتب ، ومحلها جنب محل الفول.. وعايشه في عالم اخر مع كتابها المفضل، وما تقول غير صباح الخير ومساء الخير للفيلسوف وهو رايح وراجع من محل الفول
.
لوست سول : طول عمره يجري هروب من المواقف المحرجه اللي دايم ينحط فيها وماله ذنب فيها
.
.
.
القصة
.
.
كان حمزة كالعاده يا سعاده ، مسرع باللكزس حقه، وطايروعامل الشارع حلبه سباق ، وفجاه في لمح البصر يطلع عليه من اقسى اليمين همر اسود ، حمزة طلعت عفاريتوا والسبب انه كان الهمر يتسبب في دخول حمزة الى مبنى وزاره الاعلام ودعس البنت المدلـله تالا وهي واقفه هناك .. فقرر الانتقام وفي نفس الوقت يجرب عضلاته
.
.
وفعلا قدر يوقف الهمر في وسط الشارع ، ونزل حمزة بكل عصبيه
واذا بباب الهمر ينفتح وتطلع منه ريحه العطر اللي لفت انتباه الماره
.
وما عدت ثواني من نزول حمزة ومن فتح باب الهمر الا بالمشاغبه ساره نزلت وكيلو ميك آب حاطه
حمزة ضرب جرس في مخه وقال في داخله من حظك طلعتي بنت او كنت قتلتك اليوم
لعن الشيطان حمزة وراح اطمن على المدلـله تالا وقال لها انت بخير، راحت بكل براءه بكت من الفجعه وهربت على ليال في مكتبتها
.
.
المهم حمزة طنش الموضوع وراح يركب سيارته
.
بس على مين ساره راعيه مشاكل
وقالت بأعلى صوتها يا جبان ماكو فكه مني ، انا طاقتك اليوم طاقتك ، حمزة سمع الكلام طار مخه ورجعلها وقال لها ما سمعت عيدي كلامك ثاني
.
في هذه الاثناء كان وقت مرور ماشي صح من الشارع ،وسمع الهوشه قام جري عليهم وقال ما تستحون على وجهكم تعطلون الشارع
.
مافي دقيقه من انتهاء كلامه الا وبكس جاله من راعيه المشاكل ساره في وجهه عن طريق الخطأ
وتطايرت الكتب والاوراق وطاح في الارض مغمى عليه
الموضوع كبر مره .. ساره شافت المساله كبيرت ركبت السياره وحطت رجولها على البنزين
.
.
مسكين حمزة تورط بماشي صح .. وجاء لوست سول طاير من برجوله من بعيد .. وقال عسى ما شر خير.. لقى ماشي صح طايح على الارض راح وقال انا ما لي صلاح بهذي المشاكل
.
.
انا راح اجبلك دكتور بسرعه
.
.
وفعلا ما قصر راح يجري من ناحيه محل الفول حق اروى ومكتبه ليال وينادي بأعلى صوته فيلسوف فيلسوف الحقنا وكان من حظه الفيلسوف خارج من محل الفول
.
.
.
وفي هذي الاثناء تالا وصلت عند ليال تشحق وتبكي.. ولاول مره اروى خرجت من محل الفول مفجوعه وتركت جره الفول.. وراحت عند ليال تشوف مين يبكي عندها
.
.
مع الوقت حاولت اروى وليال تهدئه تالا ومعرفه ايش حصل؟؟
هدأت تالا وراحت تحكيهم ايش حصل ..وقالت لهم انه كان حمزة يحاول يخطفها .... يا ساتر فعلا راعيه اعلام
:))
.
.
الفيلسوف وصل عند لوست سول وفهم الموضوع وراحوا طيران لحمزة والورطه اللي راح فيها
والفيلسوف ما قصر اسعف ماشي صح ..وفاق ماشي صح وقام جمع كتبه واخذ نظارته الكبيره وراح بيتهم كأنه ما حصل شئ
:))
وقال الفيلسوف لحمزة قوم معايا لمحل الفول خذ ملعقتين فول
ولا تنسوا انه الفيلسوف حياته كلها بيت . ومسجد . ومستشفى . وفول اروى
:))
.
.
.
.
ترقبوا
في الجزء القادم
.
.
.
موقف اروى وليال من حمزة و محاوله الاخطاف المزعومه من تالا
و
سندباد مصري لمن عرف بالموضوع
و
موقف حمزة من ساره
و
كيف ساره راح تتصرف
موضوع للنقاش والحوار
للاهميه
ظهر في الاوان الاخيره ظاهره عمل المسلسلات التارخيه ،لدرجه وصلوا الكتاب والمؤلفين والمخرجين يتسابقوا على الشخصيات الاسلاميه ، وايضا الممثلون يتسابقون معهم لكسب الدور
وانا من وجهه نظري .. يوجد عده نقاط اذا لم نأخذ انتباهنا منها هنقول على الدنيا السلام
دائما المخرج والمؤلف يرغبون في توصيل فكره معينه من المسلسل وتكون لهم نظره معينه او رؤيه معينه .. اذن نفهم من هذا انه اذا حتى لو غيروا من الحقيقه لن يكون عندهم مانع وهنا مشكله وبل مصيبه كبيره
###
لا نقدر ننكر ان الهدف من منتج المسلسل انه ليس التثقيف للمجتمع بل الكسب الدرامي والمادي
###
ولا نقدر ان نخفي انه من يؤدون هذه الاعمال ليسوا من المؤمنين الصادقين ولكنهم من المرتزقه الذين يريدون استثمار سيره الصحابه من اجل مكاسب ماديه
###
هناك خداع في الصوره الذهنيه الي تترك آثارا لدى الجمهور المشاهد إزاء الشخصيات الي تؤدي ادوار الصحابه وربطها بأدوار اخرى يؤدونها مما يسئ الى الصحابه
###
يقول البعض انه فقط العشره المبشرين بالجنه هم الذي لا يمكن ان تجسد شخصياتهم والباقي لا باس.. انا هنا ارد جميعهم ملقبين بصحابه رسول الله صلى الله عليه وسلم اكيد تتفاوت درجاتهم ولكن في الاخير جميعهم صحابته ..وهم افضل منا بكثير
###
والان في رمضان ارى زادت التجاوزات حتى عم الرسول (صلى الله عليه وسلم) حمزة بن عبد المطلب والصحابيان الجليلان ابو عبيده بن الجراح وعبدالله بن رواحه وصلو الى تجسيد شخصياتهم في مسلسل خالد بن الوليد
###
فعلا نحن في خطر .. خطر كبير الله المستعان
يا اخواني واخواتي الاعزاء ارغب في مناقسه الموضوع وكلي سعه صدر
ما رايكم في الحاصل في المسلسلات التارخيه انتظر تعليقاتكم
ماذا لو ؟
ماذا لو ...؟
غاب القمر
هل يمكنك ان تتصور هذا ؟
عالم بلا قمر.. هل يمكنك أن تتخيل ليل مظلم دائم ،لا تضئ سماءه سوى النجوم ؟
إن غياب القمر لن يعني فقط إلغاء جزء كبير من خيال الشعراء ، وعدد هائل من الأغاني العاطفية ،وكومة من التشبيهات البليغة ، التى تصف القمر وجماله ، وتربط بينه وبين وجوه الجميلات
الأمر أخطر من هذا كثيرا
فالقمر ليس مجرد تابع للأرض ،وجسما ً كرويا ً تنعكس عليه أشعة الشمس في الليل ، ليتألق كقرص فضي في السماء المظلمة
إنه جزء من حياتنا ... جزء كبير
إن غاب القمر يعني غابت الأهلة، وفقدان أعظم وسيلة لتحديد بدايات شهورنا العربية ، كشهر رمضان وشوال وذي القعدة ..الخ
سنفقد القدرة على تحديد مواسمنا وأعيادنا
وسنفقد أيضا ً جاذبية القمر ، التى تتوازن مع جاذبية الأرض، وتتسبب في حدوث ظاهرة شديدة الاهمية ، بالنسبة للملاحة
ظاهرة المد والجذر
ولو اختفى القمر فجأة، فسيحدث اضطراب شديد في البحار ، ستعلو الأمواج وتتضارب وتتخبط وسيختل كل القوانين الملاحية
سيصبح كل عالم من علماء البحار تلميذا ً في المدرسة الابتدائية للبحار الجديدة
وحتى في أفلام السينما ، سيحدث خلل مضحك ، فلن يكون باستطاعة البطل أن يسأل محبوبته عما إذا كانت ترى القمر ، لأنه لن يكون هناك قمر
ولن يجد مخرجو أفلام الرعب مشهدا ً افضل من مشهد القلعة القديمة ، ذات الأبراج العاليةالمخيفة ، والقمر يبرز خلفها في ليلة ليلاء
وسيفقد مخرجو أفلام الرعب أيضا واحدا ً من أفضل أبطالهم،ألا وهو الرجل الذئب ، ذلك الشخص الذي يتحول في الليالي المقمرة إلى ذئب ، يفترس ضحاياه بلا رحمه ، ثم يستعيد ادميته عندما يختفي القمر
وعلى الرغم من كل ما سبق ، فمن المؤكد أن عددا ً من البشر سيسعدهم غياب القمر ، وبخاصة اللصوص والمجرمون، أو حتى بعض محبي مراقبة النجوم
ولكن الموضوع اصعب مما نتخيل لأن الموضوع يتعلق بمجموعة شمسية بكاملها، واي اختلاف فيها أو خلل يحدث ارتباك في المسارات فتحدث الكوارث
فترتطم الكواكب بعضها ببعض ، أو تفنى في قلب الشمس، ونحن جزء منها
يا للهول ...! هل يمكن أن يفعل بنا غياب القمر كل هذا ..؟
ولكن لماذا يغيب القمر ..؟
إنه يضئ سماءنا في الليل ، ويلهم خيال شعرائنا و..... ولكن ماذا لو أن ... ؟
مع تحيات رائـد
إهداء لجميع الزوار والقراء عامه و الى قمري خاصة
*
*
*
*
وبمناسبه حلول شهر رمضان
شهر الخير والبركة
ابارك للجميع
وكل عام وانتم بخير
*
*
*
*
وبمناسبه اليوم الوطني
ابارك
لأبونا وملكنا خاصة
خادم الحرمين الشريفين
الملك عبدالله بن عبدالعزيز
حفظه الله
والى كافة الشعب السعودي عامه
سؤال وجواب
كلمه ورد غطاها
هي تقول :مغرومه فيك انا اقول : انا بحبك مغروم
هي تقول : حبيبي انا اقول: ساكن عيوني
هي تقول : روحي انا اقول : بقربك موجود
هي تقول : قلبي انا اقول :حبي شايله
هي تقول : في بالي انت انا اقول : انت في بالي
هي تقول :عادت ليالينا انا اقول : مثل اول وثاني
هي تقول : احلفك بالله انا اقول : انسي الزعل انسيه
هي تقول: غالي انا اقول: ولا غيرك غالي
هي تقول : بسمتي انا اقول : مُهجتي
هي تقول : يا اجمل صوره انا اقول: يا اجمل اموره
هي تقول :يلوموني انا اقول : ولو يعذبوني ولا ابالي ولا انسى حبك من اول وثاني
هي تقول : دنيتي انا اقول : بقربك تصفالي
هي تقول :تهواني انا اقول : لا .. اعشقك
هي تقول : تخاف علي انا اقول : هذي امانه
هي تقول : غيابك انا اقول : انسيها ولا تحطيها في بالك
هي تقول : وش فيني جميل انا اقول : طهر وشرف واصاله
هي تقول : فيني حنان انا اقول : بدأت اناله
هي تقول : اخذت قرار انا اقول : فكري بدون بعد وفرار ملكتي قلبي وعرفتي كل الاسرار
هي تقول : لا يروح بالك بعيد انا اقول : انا اعرف انك تحبيني لكن راسك عنيد
هي تقول : رائد ملكتني انا اقول: اسهر ما انام
هي تقول : احبك انا اقول : باين عليكي وتعرفي اني احبك
هي تقول : الافراح دايمه انا اقول : والامال عمرها ما تنهار
هي تقول : انت من الابرار انا اقول : وعمروا ما يغيرني احد من الاشرار
هي تقول: امكن اسافر انا اقول : وشلون .. يا ساكنه اقصى الهدب ويا حب قديم وحب انكتب
هي تقول : لا امكن اسافر انا اقول : تسافرين .. وانا ما اقوى دقيقه تبعدين.. ومالي على بعدك صبر .. وانا كرهت طارئ السفر وان كان لابد خذيني معك لاضيق .. خذيني معك يا احلى رفيق
منقول
فضيحة
لنقرأ ثم نصرخ أو نلطم أو نخرج جماعات وأفراداً لحمل موتانا وحفظهم في ثلاجة أو تربة خاصة الأمر متروك لكم بعد قراءة هذه المصيبة:كشف تقرير صادر من ادارة التجهيز في أمانة جدة عن مخالفات ارتكبت في مقبرة الفيصلية بجدة. المحضر المعد من مدير التجهيز في الأمانة كشف حقائق مثيرة حين تم التعقيب والتفتيش على سير العمل في المقبرة المذكورة وتم فتح عدد من القبور للتأكد من نظامية دفن الجثث. واتضح وجود مخالفات ذكرت في التقرير سناخذ جزءاً منها (عليكم ان ترتعبوا رعبا يليق بما حدث) التقرير ذكر ان القبر رقم 2 فيه اربع جنائز على ظهورها والرابعة فوق الاخيرة لضيق القبر، قبر 3 فيه ثلاث جنائز واحدة وسط القبر والثاني جالس بجوار الزاوية والثالث منحني ظهره وركبته مرفوعة على الجدار قبر 8 فيه جنازتان رأسهما عند مدخل القبر على ظهريهما، قبر 11 فيه جنازتان لصيقتان مع رفات عظام مجمعة خلف جنازة، شرشورة 53 قبر 3 فيه 15 جنازة تقريبا ويطلق على هذا القبر المستودع. بهذه الكارثة انتهى نص التقرير الذي نشرته عكاظ بعدد أمس.بس هذا ما يحدث بموتانا في مقبرة الفيصيلية ولانعرف حال بقية الموتى ففي حين نتصارخ من اجل اعطاء الاحياء حقوقهم ظانين ان الموتى استراحوا إلا أن جشع الأحياء وصل اليهم.على فكرة الشخص الذي قدم التقرير فصل من عمله وأقول: طبعا يفصل.. ليه ما يفصل.. لازم يفصل.. فمن لا يجرؤ على كشف عورة العابثين عليه أن يواجه عبثهم.
احدى كتاباتي القديمة
ما هو سلاح المرأة . . ؟
لم يخلق الله سبحانه وتعالى شيئا ً إلا وجعل له السبب والهدف من خلقه، فعندما تنظر إلى الزهرة الجميلة التي لا تمل من النظر إليها لإبداع الخالق في خلقها ، فسوف يأتي في بالك سؤال هو سبب وجود هذه الأشواك حولها ، ونتعجب من وجودها حول هذه الزهرة الجميلة ، فجميعنا لن يستطيع مقاومة هذه الزهرة دون أن يقطفها ، ولكن عندما نرى هذه الأشواك حولها فسوف نتردد ألف مرة قبل أن نفكر في لمسها، ولو قارنا هذه الزهرة بالمرأة فسنجد أن هنالك تشابها ً كبيرا ً يربط بينهما ، فالمرأة بذات الجمال والرونق والجاذبية ولن يمل أحدنا من النظر إليها والرغبة في امتلاكها ، ولكن إذا كانت للزهرة أشواك تحميها فما هو السلاح الذي سيحمي المرأة من القاطع لها ، فسلاح المرأة هو دينها و عفافها وشرفها والحامي لها من كل طامع وقاطع ، وإن لم تمتلك هذا السلاح ، فستكون الزهرة التي بلا أشواك وستقطع بمجرد أن تتفتح أوراقها
Raed
2000
الجزء الثالث
دا جزاء اللي يزعل حمزة ورائد
الجزء الثالث والاخير
الجزء الماضي كان بس تسخين للمفاجأه اللي اليوم راح اطلقها اليوم يا فيصل
وعلشان تكون في الصوره لازم انت تعرف انا ليش سويت كده في البدايه
ترى عيب كل يوم اصتبح وامسي والاقي فتله شاي على سيارتي العزيزة اللي دافع دم قلبي عليها
وكمان فاكر يوم ماسفرت مع الضيف اللي معايا وانت حجزت الفندق، وبعد ما اسافر ،اتفشل و انا هناك ووطلع مافي حجز من اساسه مع العلم انك انت دقيت على صدرك وقلت عندي .. والله راح اتعب وانا اكتب انت ايش تسوي
بس انا الان مرتاح لاني راح اقولك كيف انا رديتها
:))))
هنا بدايه القصه
ودار الحوار في سيارتي بيني انا وفيصل وحمزة
واحنا بنشرب الشاي الاخضر
فيصل : رائد ليش ما تتجوز ؟
رائد : كل شئ في وقتوا حلوا
فيصل : انت مستني ايش ؟ حطيت العذر في السياره اللي تبغى تشتريها واشتريتها باقي ايش
رائد : انا مستني لحد انت ما تتجوز
فيصل : حاله صمت ... اه اه لا ما ابغى
رائد : ليش ؟
فيصل : نفسيتي ما تسمح
رائد : يعني معقد ههههه
حمزة : ههههههههه
لحظه صمت دامت دقيقتين .. وفجأءه
فيصل : ههههههههههههههههه
رائد وحمزة بنفس واحد : خير اتجننت عسى ما شر
فيصل : لا بس ايش رايكم نتزوج كلنا سوا
رائد : خلاص فكت العقده فجاءه
حمزة : والله ما قال نتجوز سوا الا وراه مصيبه
فيصل : هههههه ايش رايكم نتزوج مسيار
رائد وحمزة : كأن واحد لطش كف على وجيههم
فيصل : انا اتكلم جد
رائد : ترى انت تتكلم على شئ مستحيل
حمزة : اسمحلي يا فيصل اقولك على بلاطه انت اتلحس مخك
فيصل : انتم بس فكرو في الموضوع وانا معاكم في اي وقت
رائد وحمزة : خير .. خير ان شاء الله
وكل واحد راح على بيته
وبعد ثلاثه شهور
رائد : الووو فيصل فينك ؟
فيصل : انا في البيت
رائد : ابغاك ضروري
فيصل : خير
رائد : وحشتني وابغى اشوفك
فيصل : طيب خلاص الان اقابلك
رائد : اوكي
وبعد نص ساعه
رائد : فيصل جبت لك عروسه
فيصل : مين دي ؟
رائد : انت ما تعرف .. بس بيني وبينك انا اتزوجت مسيار
فيصل :ايش ؟؟؟؟؟؟؟؟؟؟؟؟؟
رائد : جد انا فكرت في كلامك واقتنعت
فيصل : انا كنت امزح معاكم
رائد : انت عارف انه انا ما امزح وكنا نتكلم جد
صمت ابو دقيقه
رائد : والله البنت مره فله وعندها اخت تنفع لك
فيصل : ما ابغى
رائد : صدقني عصب عنك بعد ما تقنعني تبطل .. والله اخسرك
هنا فيصل حس بتأنيب الضمير
فيصل : انت اتسرعت
رائد : لا .. عادي
فيصل : اهلك يعرفوا بالموضوع
رائد : انت مجنون .. اكيد لا
فيصل : هذا احلى ما في الموضوع
بعد اربع وعشرين ساعه من الحوار
فيصل : رائد سامحني والله صعبه
رائد : شئ يرجعلك بس عرفت انك راعي كلام
ودارت الايام وبعد ثلاثه شهور من الزواج الوهمي ههههههه
رائد : ترن ترن .. الووو مين ؟
فيصل : انا فيصل كيفك يا رائد ؟
رائد : بصوت حزين تماااام
فيصل : ايش فيك ؟
رائد : ولا شئ
فيصل : انت بخير .. اهلك بخير
رائد : ماشي حال
فيصل : لا يكون الموضوع حرمتك
رائد : مممم بصوت حزين ايوا قربت
فيصل : لا تقول ايش في
رائد : الحرمه حامل .. ومن جوه نفسي ههههه
فيصل : يا شيخ
رائد : جد
فيصل : ايش راح تسوي .. راح تقول لاهلك
رائد : انت ابله .. والله ابويا راح يطخني وامي راح تنجلط
فيصل : طيب ايش الحل
رائد : ما ادري .. بس لو انا عندي حل كان هذا حالي
فيصل : انا لازم اقابلك يا رائد
رائد : ما ليا خلق اقابل احد.. خليها في نهايه الاسبوع
فيصل: خلاص طيب بس لكل شئ لو حل ولا تشيل هم
رائد : خير ان شاء الله
فيصل : باي
رائد : باي
واول ما انتهت المكالمه رحت اتصلت على حمزة وانا ميت ضحك
رائد : الوو حمزة ههههه
حمزة : ايش فيك
رائد : اكلت فيصل الكوبري هههه
حمزة : ايش سويت
رائد : الموضوع اللي اتفقنا عليه حق الزواج ههههه وكملتوا بخلفه ههه
حمزة : الله يقطع شياطينك .. انت جالس تلعب على كبير هههههه
رائد : نهايه الاسبوع اشوفك سلام
حمزة : سلام
وجاءت نهايه الاسبوع وقابلت فيصل في البدايه اليوم قبل خروج حمزة من النادي
فيصل : لقيت لك حل يا رائد
رائد : بسرعه اعطيني .. ترى عقلي متوقف وما قدرت افكر
فيصل : اهلك لازم يعرفوا وبس عن طريق اخوك الكبير خالد وخاصه هو اقرب الاولاد لك وقريب من اهلك كتير
رائد : صعب يعرف اخويا راح اطيح من عيونوا
فيصل : مممم
رائد : فيصل يا تجيب حلول كويسه او روح انقلع على بيتكم
فيصل : والله ما ادري بس من هذاك اليوم وانا ما جاني نوم بس افكر
رائد : لاااااااااازم يموت الولد .. ومن جوتي اموت ضحك
فيصل : لااااااااااااااااااا حرام عليك هذي روح
وهنا فيصل بدأ في الانهيار والبكاء
رائد : الله يخليك لاتزود همي
فيصل : انت تقتل ولد انت مجرم ما عندك قلب
رائد : هات حل تاني
فيصل : اه اه ما عندي .. ودموعه على خده
رائد : خلاص راح اطلقها وارتاح
فيصل : لاااااااااااااااااااا رائد حرام عليك انت ايش جالس تسوي
رائد : ايش في ؟ انا في اللحظه هذي عرفت اني جالس اقلب مواجع فيصل
فيصل : مو من حقك تعيش الولد كده وانت عايش ،ويكون مشتت بين امه وابوه
رائد : والحل
فيصل : انا ماشي
رائد : على فين ؟
فيصل : انا راح اروح لشيخ اعرف لو مات الطفل في اي سن ما يعتبر روح وازهقناها
رائد : طيب
وراح فيصل وجاء حمزة واحنا بس نضحك ههههههه
ولحد يومكم هذا فيصل شايل هم الزوجه الوهميه والطفل الوهمي هههههه
علشان كده لازم نضع حد ولازم يعرف
فيصل سامحنا بس كان لازم نرد الدين بواحد كبير .. كبير مره ههههه
ومعليش لاننا استغلينا نقطه ضعفك
وفي اللاخير
دا جزاء اللي يزعل حمزة ورائد
